場景：某城市山上的發電廠

人物：阿標、柔柔

時間：黃昏

柔柔 (二十多歲，斯文，樣子普通) 到達小山上的發電廠，發瘋似地按動那些巨型開關掣、檢查大型電線…似乎都沒有用，她一副沮喪失敗的樣子，走近發電廠的窗前，那裡可以眺望整座城市。

由左至右，由遠至近，城市裡一個人也沒有。

天開始黑，沒有半點燈光的城裡，暗下來。

柔柔回頭，發電廠裡只有一盞燈微弱地亮著，燈旁寫著「後備燈」三個字。

柔柔流下眼淚。

黑畫面+字幕：只有二人的世界

阿標 (三十到敏，外型粗魯) 走進發電廠，面紅紅，似乎喝了酒。

阿標走近柔柔，她一手推開他。

柔柔憤怒：今次三日，之前兩日、五日、七日，唔係飲醉酒就唔見咗人，你話你有咩資格做我男朋友呀？我受夠喇！

柔柔，再加一句：我以前男朋友邊係你咁呀！

阿標開始有火：以前以前，我以前啲女夠邊有你咁Q煩呀！吓！

阿標越諗越嬲：你咁唔滿意咪扯囉！跟住我做咩啫？

(做咩啫同柔柔句咁分手咯疊聲)

柔柔：咁分手咯，陳文標，係，個世界死淨你一個，我都唔要同你一齊呀！

阿標：走啦！走啦！

突然又衝向柔柔：一係你隊死我！嚟吖！嚟呀！

柔柔尖叫：放開我，你痴線架！

她想推開阿標，此時後備燈噗聲燒了，連最後一點光也沒有，四周漆黑一片，柔柔好驚，慌忙抓著阿標的手臂。

柔柔自言自語：最後一盞都無埋，最後一盞都無埋…

其實阿標都驚，但在女人面前強裝鎮定。

阿標：頭先邊個話唔要同我一齊話？

柔柔氣憤地鬆開手。

阿標摸黑打開幾個櫃桶後找到一個後備燈泡，擒高換燈泡。

燈亮了，柔柔看著阿標，眼神變得比較溫和；阿標經過一嚇，也看見她臉上還有淚水，酒氣和怒氣消了一點。

阿標：好，咁睇下咩原因搞到成個城市都冇電先！

阿標在發電廠走來走去研究。

柔柔細細聲：一定係有啲嘢過唔到電啦…

柔柔發現自己說錯話。

阿標停了一下，自言自語：係咯，之前都好地地架，點解忽然過唔到電呢？

柔柔白他一眼。

阿標自說自話：一定係有條電線唔like (音：like-kee)喇，等我搵佢出嚟了解下先！

柔柔又看一看他，看見他認真地研究那些毫無分別的電線，不禁定定的看著，眼神又變得柔和一點。

阿標繼續說：哦，唔係，原來係有啲根基唔夠穩陣。

阿標重新固定一個鬆掉了的巨型插頭，然後，機器摩發出轟轟轟轟，啟動的聲音，接著無人的馬路上、無人的大廈，整個空殼城市，所有的燈，一下子亮起來。

阿標：搞掂，好彩以前做過水電！

柔柔再次見到城市的光，感動得眼濕濕。

然後柔柔和阿標站到窗前，看城市的夜景。

阿標忽然感觸地說：如果你走咗，人類就要滅亡架喇。

柔柔痛哭起來，阿標攬一攬她。

阿標：你咪話有個心願，想同以前條仔喺嗰間大教堂結婚嘅，不如遲啲…我哋，嗯，遲啲…去嗰度行個禮啦…

柔柔抬起頭，面上還有淚珠：點解…

阿標拍一拍柔柔，示意她走向出口：行啦，冇得揀架喇，我哋，不如返落城度揀下啲婚紗、戒指啦…

柔柔猶疑一下，然後點點頭。

阿標和柔柔走出發電廠，向著千千萬萬戶燈火通明的城市走去。

柔柔：其實著晒燈但一個人都無嘅城市真係幾恐怖，不過試過前兩日完全冇光嘅夜晚…先知原來恐怖都唔係最差。

阿標：如果連光都冇埋，就真係絕望喇。

隔一會。

阿標低著頭低聲說：你嘅難過，我點會唔明呢。

阿標拖起柔柔的手，向城市的方向繼續走去。

黑畫面

字幕：

給所有絕望的人類，和

字幕：

自以為絕望的人類

完